الحمدلله و بفضل من رب العالمين .. و باصرار مني و تشجيع من زوجي و اهلي و دكتور همام قدرت استمر عالرضاعه الطبيعية المطلقة رغم الظروف الي مريت فيها (وزن ولدي قليل – أم عاملة و رجعت للعمل و ولدي 6 اسابيع – حليبي كان قليل ) ..

استمريت عالرضاعه طول الوقت .. في الليل و النهار .. ولدي كان ينام جنبي عالسرير علشان اقدر ارضعه عند الطلب و كمية الحليب تزيد .. و الحمدلله سار ولدي تقريبا 6 شهور و بدأنا ندخل الاكل .. و حبة حبة على عمر الاحدى عشر شهر تقريبا قللت عدد رضعاته في النهار بحيث كنت كل اسبوعين الغي رضعه و استبدالها بسناك صحي و موية في الكاسة (ربع موزة / خيار شرايح / بطيخ / بسكوت شوفان / بودينغ بحليب اللوز … ) ..

سار عمره 12 شهر و وصلت رضعاته الى 3 رضعات خلال النهار و رضعتين الى اربعه رضعات خلال الليل ..

قررت اني الغيله رضعة الليل لمن حسيت انه في استعداد و حسيته بيتقبل الاكل ..

جهزت نفسي و زوجي و شرحتله انه حتكون فترة نتساعد فيها و نستحمل البكى و نصبر علشان صحة اسنان ولدنا و علشان يتام نوم اطول .. و بالفعل كل تقريبا 4 ايام كنت الغي رضعه .. اعطيه بدالها موية و احضنه و اطبطب عليه الين يرجع ينام .. طبعا الموضوع مهو سهل ابدا .. لاكنه مهو مستحيل .. و الحمدلله تم و حصل انه لغينا رضاعة الليل ..

الي استفدناه و لاخظناه على طول انه بالعافية سار ينام اطول .. و يصحى اقل .. و سار عوا لمن يصحى عارف انه ماراح يشرب الا موية و يطلب (موه) بنفسه ..

علشان تقدري تسوي دي الخطوة لازم تتوفر عندك اساسيات :

– تكوني مستعدة انت و شريكك استعداد تام .. تستحملو البكى .. تصبرو .. و مايكون في عصبية عالطفل ابدا

– حطي في بالك انه هوا اتعود انه يرضع في الليل و فجاءة بتغيريله الروتين فاعطية وقته حتى يتقبل دا الشي

– حاولي تعشيه كويس .. و ترضعية رضعته كامله في الليل ..

– حاولي تخليه يعنل مجهود بسيط في الليل .. انا كنت اروشه و اخليه يلعب في الموية تقريبا ربع ساعه ..

– لازم تكوني لابسة لبس مقفل بحيث انه تساعدية مايفتكر الرضاعه او يحس انه ممكن يرضع

– اتبعي معاه روتين ليلي ..

# فطامك من الرضاعه الليلة لايعني ابدا انك تفطمية من رضاعة النهار .. حاولي و باذن الله راح تقدري تكملي للسنتين ..

الله يبلغنا كلنا الاجر .. و يبلغنا في اولادنا و بناتنا البر يارب ياكريم