‎الحمدلله ربي اكرمني و حملت في ولدي احمد .. من يوم ماحملت و انا قررت اني ارضعه طبيعي .. اتثقفت و قرات و هيأت نفسي للرضاعه .. ولدته في الاسبوع ال 38 كان وزنه 2.7 و اول ماولدته طلبت يحطوه على جسمي skin to skin و يرضع مني .. و بالفعل الحمدلله رضع مني خلال الساعه الاولى من الولادة .. في المستشفى كان معايا و كان بيرضع مني طول الوقت الحمدلله .. رضاعته قليله بس انا مقتنعه انه هوا دا الي كان يحتاجه .. خرجنا من المستشفى و يوم التطهير قسنا وزنه كان عمره 4 ايام سار تقريبا 2.5 اعتقد بسبب انه المويات نزلت من جسمه .. قرات و طلع طبيعي انه الطفل يفقد من وزنه .. استمريت في الرضاعه و استشرت صاحباتي و دلوني على دكتور همام على اساس يشجعني مع اهلي و زوجي عالرضاعه الطبيعيه .. و بالفعل الحمدلله رحت لدكتور همام و مشيت امورنا كويسه .. مع انه لمن قاس وزن احمد و حط وزنه على منحنى النمو كان وزنه تحت اقل منحنى و كانه هزيل .. لاكن طوله و محيط راسه كان كويس .. و شرحلي الدكتور انه حيزيد وزنه مع الايام و انه اطفال الرضاعه الطبيعيه ممكن يكون حجمهم اصغر من الاطفال التانين الين يوصلو لعمر سنه ونص او سنتين .. عدت الايام و زكم ولدي و طلع دكتور همام اجازه .. رحت لدكتور تاني و لمن شاف ولدي و شاف الصورة الكلية حقته (وزنه القليل و مغص بطنه الشديد و كان احمد من الاطفال الي لمن يرضعو على طول يتبرزو في اثناء الرضاعه) .. الدكتور على طول دخل معايا في موضوع تاني انه طفلي حجمه صغير جدا و انه وزنه مو تمام لسنه وانه لازم ادخل صناعي .. حطلي احتمالية انه ولدي يكون عنده لاكتوز انتولرنس ((حساسيه من الحليب )) على الرغم انه هوا مابيرضع غير من حليبي .. طبعا مره انا انقهرت و حسيت اني باظلم ولدي و بكيت .. و استخرت كتير و رجعت لدكتور همام .. ارسلي مقالات و قرات في الموضوع و الي استنتجته انه هادا الشي نادر جدا جدا .. دلني الدكتور على دكتورة تانيه اختصاصها رضاعه طبيعيه (د.رذاذ) و رحتلها و قالتلي انه الكلام غلط و شرحتلي و عرضت حالة ولدي على دكتوره في مستشفى اطفال في كندا و ردت عليها انه تقريبا الكلام دا شبه مستحيل و غير صحيح .. و انه اهم شي نمو الطفل الفكري و البنياني و محيط الراس زي ماكان دكتور همام بيقول .. و استخرت و استشرت و استمريت في الرضاعه الطبيعيه و كنت كل مااطعمه نوزن و نقيس و يطلع الوزن تحت المنحنى ولاكن بينمو على قده .. استمريت في الرضاعه الطبيعيه المطلقة بدون اي شي ولا حتى اعشاب ولاةحتى يانسون الين 6 شهور .. و بعدها دخلت الاكل بالتدريج .. الحمدلله ولدي دحين 8 شهور و نص و سار وزنه داخل المنحنى بدون اي حليب صناعي .. و بدون سيريلاك ولا مكملات غذائيه صناعيه .. لازم الام تكون مؤمنه انه هيا بتعمل الصح لولدها و انه هادا رزقه من ربنا مافي شي افود و احسن منه .. و طبعا يكون الموضوع تحت اشراف طبيب مختص في الرضاعه علشان يكون كل شي باذن الله ماشي في السليم