السلام عليكم ورحمة الله وبركاته
الاسم: ياسمين علي
العمر: ٢٧سنه
المهنه: تركت العمل والدراسه للتفرغ لولدي.
في البدايه بس كان يبكي وماكنت اعرف انو لازم اراقب التبول. كنت احطو على صدري ٦ ساعات متواصل و بعدها يبكي جيعان.
اعطيتو صناعي واستمرت رضاعه صناعيه ٦ شهور وكنت ارضعه طبيعي وقت النوم عشان يرجع ينام بس يعني بس يتطمن اني جمبو ويترك صدري بعد دقيقة رضاعه فقط او دقيقتين في الشهر السادس اتفاجأت ان الحليب عندي صار اقل من ملعقة شاهي والصدر الثاني تقريبآ نقطتين فقط.
ربي الهمني اني اروح لدكتور همام قنديل ونصحني اجبد و سكن تو سكن وآكل مدرات الحليب.
ولدي كان ماينام عشنو ماهو شبعان بس كنت اصر على انو ما اعطيه صناعي بس احيانآ كنت استخدم الرضاعه بالانبوب كنت اتذكر كلام الدكتور انو ممنوع قارورة و اعطية بالانبوب.
والآن انا ارضع طبيعي ١٠٠٪ بدون انبوب بدون قارورة والسبب الرئيسي بعد الله الي رجعني للرضاعه الطبيعيه هوا تشجيع الدكتور المستمر فعلآ هذا هوا السبب الرئيسي بعد الله.والسبب الثاني لاني قطعت القارورة ولدي صار رافض القارورة تمامآ اذا اعطيته قارورة يسير يبكي ومايبغى لانه تعود على صدري ودا سبب لي ظغط وتعب لانو ماصار ينام لانو ماهو شبعان وخلاني على طول اعطية صدري ومرة تعبت الين حليبي صار يكفيه و يشبعو طبعآ مرت عليا ايام كنت انهار بكى و عذاب نفسي لاني ولدي جيعان وماابغ اعطيه قارورة وحليبي ماكان يكفيه بس اصراري وتشيع ومتابعة الدكتور خلاني ما اعطيه قارورة نهائي والحمدلله لكل مجتهدٍ نصيب.
طريقتي في تكثير حليب صدري: التجبيد التجبيد التجبيد
واحط ولدي على صدري قد ما اقدر والاكل المتكامل يعني بروتين و نشويات وخضار وكالسيوم و فيتامينات
والشمر ممتاز
و شاي اعشاب اسمو مذرز ميلك من جي ان سي ممتاز مرة كثري الحليب
وحبوب ماتيليوم
والاصرار والصبر.
انا بدأت ارضع ولدي من الشهر السابع اليوم ولدي عمرة ١١ شهر والحمدلله برضع طبيعي١٠٠٪ .
والحمدلله على هذة النعمه.
ياسمين