هو مرض وراثي يورّث من الأم أو الأب
الكثير من الأهالي عند إخبارهم بإصابة طفلهم بالربو يشعروا بالفزع والهلع أذكر مره قلت لأب إنه ابنك مصاب بالربو قال لا قالوا بس حساسية مو ربو
في مرات نضطر نقول للأهل إنه هذه حساسية صدر مو (ربو) لكن في النهاية
هي كلها نفس الشيء .
مرض الربو او حساسية الصدر مرض وراثي كما ذكرنا ماله علاقه أبداً
بوجود شخص كح في وجه الطفل أو مرّ على واحد مسخن أو جارنا عنده ربو وجاته عدوة.
ينتقل فقط بالوراثة ومو شرط نقول وراثة يعني انه الأب أو الأم عندهم
ربو أو حساسية صدر لأ
نقصد وجود أي نوع حساسية
ممكن حساسية جلد أو حساسية عين
كذا يصنف الشخص إنه عنده (قابلية جينية)للحساسية وممكن تتورّث للأطفال بأي نوع من أنواع الحساسية
جلد أو عين أو أنف أو حساسية صدر (ربو).
الربو شيء منتشر
تقريباً ٢٠٪ أو ٣٠٪ من الأطفال عندهم حساسية بأي نوع من أنواع الحساسية مو لازم حساسية صدر.
الآن إذا اتشخص الطفل بأنه مصاب بحساسية صدر حيكون صدره فيه خلايا محسسة بالتالي يستثار بأي شيء
زي الدخان،البخور،الرضعة القوية،تغير الجو،المطر،قص الزرع.
هذه الخلايا المحسسة في الصدر عندما تستثار تُفرز مواد كيماوية تخلّي الشعب الهوائية اللي في الصدر يحصل فيها ٣ حاجات:
أولاً / ضيق في الشعب الهوائية فيصير الطفل ما يوصل له هواء فيحس بإختناق.
ثانياً/ يحصل مثل التورّم داخل الشعب الهوائية ويكون التورم شبه المويا،لكن في الحقيقه هي مو مويا هي مواد كيماوية تخلي المواد اللي داخل الشعب الهوائية تزيد وتسبب احتقان.
ثالثاً/يزيد البلغم في الشعب الهوائية
هذه الثلاث أشياء ممكن تحصل إذا حدثت استثارة للخلايا المحسسه ويصير عند الطفل أعراض الكحة وممكن عدم القدرة على النوم بسبب ازدياد الكحة ليلاً
اذا نقول هنا إنه من الأعراض البسيطة لتشخيص الربو الكحة الليلية الشديدة والمستمرة.
الأشعة لا تستخدم في تشخيص مرض الربو، يوجد له تحاليل أخرى
إذا الطفل اتشخص بالربو علاجه يكون بالمنع.
إيش المقصود بالمنع
الأطفال كما ذكرنا صدرهم يكون مايتحمل الغبار أو الموكيت أو الألعاب اللي تحتوي عالأقمشة الصوفية أو الوبرية وإن وُجدت لازم تتنظف مره في الأسبوع وتغلى على درجة حرارة عالية أو تتشمس أو تُقام من المنزل كمان المخدات لازم تُستبدل بمخدات خاصة لها قدرة انها تمنع تجمع المواد المحسسة،ويشمل الكلام الشراشف انها لازم تتغسل وتتغلي مره في الاسبوع
أيضا فلاتر المكيفات عالأقل كل أسبوعين أو ٣ تتغير أو تتنظف حسب نوع المكيف.
أمر مهم تهوية المنزل ،من آفات هذا العصر المكيف اللي يدوّر الغبار والجراثيم فيصير جو الغرفة مو نظيف
أذكر هنا بنتي كانت تبغى تشتري منقي للهواء فقلت لها إني ضد هذه الأشياء لأنه مافي منقي زي تهوية البيت وفتح الشبابيك مره أو ٢ في اليوم
أيضا من الأمور الممنوعة الدخان والبخور والمعسل اللي هي في الأصل كمان ممنوعة للكبار إذا انت كأب مو من حقك تدخن قدام زوجتك وأولادك
بالذات أول ثلاث سنوات لأنه رئة الطفل لسه مااكتملت.
نجي لموضوع الأدوية
إحنا ذكرنا إنه الربو يسبب (ضيق،احتقان،بلغم)
بالنسبة للبلغم:
أنا ماأحب استعمل الأدوية ومع الحاجات الشعبية زي اللبان الشحري وورق الجوافة.
الضيق لازم له حاجات توسع الشعب الهوائية وهذا نستعمل له الفنتولين أو البيتالين وهذه الأدوية مشتقة أصلا من مادة الكافيين اللي موجودة مثلا في القهوة ولهذا فإنه من آثار شرب القهوة الكثير توسع الشعب الهوائية،وادرار البول وممكن مع الوقت توسع ضيقة الصدر.
ليش بأذكر إنها مشتقة من الكافيين لأنه للأسف في ناس في المجتمع يحبوا اثارة البلبلة وبعض الأمهات اللي يفتوا يقولوا لهم لا تستعملوا الفنتولين لأنه يسبب إدمان ويتعب القلب والأعصاب.
هذا كلام غير صحيح كثرة استخدامه ممكن تسبب فقط رعشة مثل اللي تحصل إذا زودتي شرب كافيين كثير
مو معناته مضر وإنما تحتاجي تقللي ونكرر ما يسبب إدمان.
أخيراً أدوية الإحتقان
أحيانا في الإحتقان نحتاج كورتيزون مخفف جداً (٥٠ مايكروغرام) كبخاخ يوصل مباشرة للصدر.
مو كورتيزون زي زمان كنا نستخدة ٤٠ أو ٥٠ مل غرام
الطفل اللي تتكرر عنده الحساسية كل شهر أو شهرين نستخدم دواء زي السنغولير .
هذه الأدوية تقلل قابلية إثارة الخلايا المحسسة في صدر الطفل
كأني بأعطيه أدوية ضد الحساسية مخصوص لهذه الخلايا اللي تحسس الصدر كل شوية.
تجي دي الأدوية على شكل حبوب ياخذها الطفل مره في الليل ممكن تستخدم من شهر إلى ٤ شهور
أو على شكل مسحوق يذاب
وبعض الأطفال نضطر لإستعمال انتهستامين كشراب لتقليل الحساسية.